Posted in News

20 vloaz Startijohns !

Me soñje din e oa echu gant Elenig hag ar baotred… met c’hoarvez a ra din c’hoazh kejañ gant tud a n’anavezan ket hag a c’houlenn din pegoulz e teuio ‘maez ur rann nevez… Ma, evit 20 vloaz Startijennohns e oa ret ober un dra bennak, avat !

Advertisements
Posted in News

StartiJohn’s feat. Startigirls – POK UR FESSE

Un tamm sonerezh evit cheñch !

Abaoe un nebeud amzer ‘m oa c’hoant lakaat un tamm sonerezh war ar chadenn Youtube, setu neuze ur ganaouenn un tammig ispisial, un doare “bilañs” ag an heuliad “Elenig hag ar baotred”, araog monet war-zu traoù all… (menozioù ‘m eus, met n’on ket gouest da lavarout deoc’h c’hoazh petra vo dibabet, ha pegoulz…).

Da c’hortoz, pakit plijadur, diskanit ar paozioù, ha rannit an traoù m’emaoc’h plijet !

PS : Tro ‘m eus bet da gejañ gant tud a anaveze ma videoioù e Gouel Broadel ar Brezhoneg. Ur gwir blijadur eo bet gwelet o doa troet ma videoioù e “bedig bed ar vrezhonegerien”, hag e oa ur gwir youl evit ma kendalc’hfe an traoù. Setu trugarez d’an dud o deus lakaet da droiñ, ha trugarez ivez d’an dud o deus bet tro da lavarout ur gerig din e-pad an dibenn-sizhun !

Posted in News

DIHUN : filmig-berr

Ac’hanta tudoù, laouen on kinnig deoc’h ma filmig-berr kentañ !

Abaoe un nebeud mizioù em boa c’hoant monet un tamm pelloc’h ganti war ma chadenn Youtube, c’hoant krouiñ traoù e brezhoneg penn-dre-benn, dre ober filmoùigoù dre-skouer. Pa ‘z eo bet kinniget din kemer perzh er genstrivadeg filmoù-berr gentañ aozet gant Daoulagad Breizh ha Ti ar vro Douarnenez em eus soñjet e oa poent din fichañ ma revr ! Ha mat ‘m eus graet, war a seblañt, peogwir eo bet tapet ganin ar priz kentañ !
Gant ma vezoc’h plijet evel eo bet ar juri, skignit an traoù tro-dro deoc’h ha n’ankouaezit ket d’en em goumanantiñ d’ar chadenn, un doare da ziskouez ivez ez eus tud dedennet gant ar c’hrouiñ e brezhoneg, n’eus ket gwellañ arguzenn d’am soñj ‘vit lakaat ar mediaoù “hengounel” da gompren…

 

Posted in News

Elenig hag ar baotred : 18 munutenn plijadur !

Lakaet ‘m eus er-maez un nebeud deizioù zo “Elenig hag ar baotred 2”. Dindan goulenn pouezus ar publik (gwir!) em eus dibabet kenderc’hel gant troioù-kaer Elenig hag e vignonezed. C’hoant ‘m eus bet sevel un istor klok ar wech-mañ, met chom gant ar memes lusk ha bezañ gouest da zispakañ un nebeud “punchlinoù” endro… An diaesañ a zo bet dibabiñ tre-ha-tre ar senennoù da glotaat gant ar senario ‘m oa dibabet hag ijinañ evit pep frazenn un dra bennak a jaoje gant ar pezh ‘veze lâret gant an dud er video a-orin (peurliesañ ‘m oa ar menoz dre vras hag e oa aes din kaout ar frazennoù gentañ, met n’haller ket didroc’hañ tout ar senennoù : ret eo kemer ar senennoù klok, mod all n’eo ket gwall brop, hag ijinañ ur frazenn a glot tre-ha-tre gant hirder ar frazenn orin, pezh a lak ‘c’hanoc’h d’en em soñjal kalzig a-walc’h… Ar pezh n’eo ket fall gwechoù-zo evit kaout menozioù dic’hortozet pa vez savet ar senario er penn-kentañ).

Setu, ul labour hir eo bet, met kontant on deus an disoc’h. Kontanoc’h c’hoazh pa welañ eo bet lodet ar video gant Startijenn o-unan àr ho pajenn facebook. Setu tud o deus fent d’an nebeutañ !

Distroet eo the “Starti’Johns” !